Sipas disa dokumenteve të paraqitura në gjykatë, pretendohet se ish-bashkëshortja e Elton John krijoi një identitet të ri dhe u fsheh në një fshat britanik, në përpjekje për të hedhur pas raportin me këngëtarin.
Renate Blauel po kërkon një dëmshpërblim prej 3 milionë funtash duke pretenduar se ai i ka shkaktuar shqetësime të thella psikologjike dhe ka shkelur marrëveshjen e divorcit më 1988-n ku theksohej se nuk duhej të diskutonte martesën e tyre.
Muajin e kaluar, The Guardian zbuloi se Blauel është përpjekur të shmangë vëmendjen e publikut për tri dekadat e fundit. Ajo ka ngritur një padi ndaj ish-burrit, fill pas botimit të biografisë së Elton John, “Me”, si edhe filmit shoqërues, “Rocketman”. Dosjet ligjore të paraqitura në gjykatë nga avokatët e saj pretendojnë:
– Blauel ndryshoi emrin dhe mori një identitet të ri me qëllim që të hidhte pas krahëve lidhjen e vjetër.
– Në vitin 2001, ajo u tha miqve dhe të njohurve se po shkonte për të jetuar te prindërit në Gjermani, por në fakt u fsheh në një fshat britanik
– Blauel, në përpjekje për të shmangur shtypin në Britaninë e Madhe, bleu një shtëpi në emër të një miku dhe fshehu çdo të dhënë si ish-gruaja e Elton John.
John dhe Renate Blauel u martuan në Australi në vitin 1984, kohë kur këngëtari po luftonte me seksualitetin e tij. Sipas Blauel, kur u ndanë, u vendos një klauzolë në marrëveshjen e divorcit ku thuhej se asnjë palë nuk do të diskutonte “martesën dhe arsyet e ndarjes”.
Ajo thotë se “u përpoqën të kishin fëmijë gjatë marrëdhënies së tyre, por nuk ishin në gjendje ta bënin këtë”, në kundërshtim me pretendimet e John se ai nuk donte një familje deri sa takoi burrin aktual, David Furnish.
Avokatët e Blauel pretendojnë se ajo, për shkak të marrëdhënies, ka luftuar me shëndetin mendor për kohë të gjatë, që përfshin: makthe të përsëritura, ankth, depresion, frikë, shkruan anabel. Publikimi i autobiografisë dhe filmit, sipas Renate Blauel, ka shkelur klauzolën në marrëveshjen e divorcit.
Nga ana tjetër, avokatët e Elton John argumentojnë se shumë nga aspektet e martesës së tyre ishin tashmë të njohura dhe arsyet e divorcit të tyre ishin tashmë publike – domethënë, ai ishte një homoseksual që dëshironte të ishte në një marrëdhënie me një burrë. Ata thanë gjithashtu se është e pamundur që Elton John të mbajë përgjegjësi për shëndetin mendor të Blauel pasi ajo kishte pasur probleme shumë përpara publikimit të filmit “Rocketman” dhe autobiografisë së tij.
