Lëkura është ajo pjesë e trupit që ndërvepron drejtpërdrejt me mjedisin e jashtëm. Ndryshimi i klimës ndikon shumë në lëkurën tonë, dhe kjo vihet re menjëherë. Temperaturat e ulëta, ajri i thatë dhe i ftohtë, nxehtësia në kombinim me djersën, ngrohja e tepërt artificiale në ambiente të mbyllura, favorizojnë plakjen e parakohshme dhe shfaqjen e sëmundjeve të lëkurës.
Lagështia është padyshim “miku” më i mirë i lëkurës dhe mungesa e saj është një nga faktorët që ndikojnë negativisht në të. Në ditët dhe muajt kur lagështia është e lartë, lëkura është më e hidratuar dhe më elastike. Por alternimi i papritur i lagështisë dhe nxehtësisë mund ta thajë lëkurën. Për më tepër, gjatë verës kur temperatura rritet dhe lagështia zvogëlohet shkaktohet dehidratim.
Në mënyrë që të mos keni nevojë të merreni me ndonjë nga ndërlikimet e mësipërme, mund të ndiqni hapat e mëposhtëm:
– Më e rëndësishmja është përdorimi i një kremi kundër diellit, me një indeks të lartë SPF në muajt e verës dhe të dimrit, sepse edhe pse nuk ngrohemi në dimër nga “dielli i nxehtë” i verës, nuk do të thotë se nuk na dëmton.
– Pini shumë ujë ose lëngje (jo të paketuara dhe pa sheqer), përfshini frutat dhe perimet në dietën tuaj dhe përpiquni të flini mirë.
– Aplikoni hidratues në fytyrë, menjëherë pas dushit, pasi atëherë lëkura mund të thithë më mirë përbërësit.
– Për muajt e ftohtë rekomandohet eksfolim më i shpeshtë (si në fytyrë ashtu edhe në trup), në mënyrë që të hiqen qelizat e vdekura. Rekomandohet gjithashtu përdorimi i produkteve të kujdesit me përbërje më hidratuese sesa ato të përdorura gjatë muajve të verës.
– Shmangni banjot e nxehta, pavarësisht sa ftohtë është jashtë, pasi dehidraton lëkurën.
