Në muzikën e popullarizuar, një version cover apo ribërje e këngës apo “Remake” siç ekziston edhe versioni në gjuhën angleze është një performancë e re muzikore duke u bazuar në një material ekzistues, i krijuar më parë si origjinal nga një artist.
Zakonisht, këto këngë janë shumë të popullarizuara në audiencë, dhe tashmë populli e di çdo varg të sajin!
Me raste e raste, një cover këngë është bërë më e famshme se origjinali sic ishte versioni i rikrijuar nga Elvis Presley i këngës “Blue Suede Shoes” që më parë ishte kënduar nga Carl Perkins, apo kënga “I Will always love you”, që të gjithë mendojnë se është e këngëtares Whitney Huston, megjithatë ajo ishte shkruar nga Dolly Parton.
Versionet cover të këngëve, mund të cilësohen edhe si një përpjekje për ta ringjallë një këngë te gjeneratat e reja, e zakonisht ndodh kur kënga ka qenë shumë e popullarizuar.
Së fundmi, në industrinë muzikore shqiptare, kemi parë me dhjetëra projekte të tilla muzikore, ku vargjet e një kënge të vjetër shqipe, po sillen me ritëm të ri e të kombinuara me tekstet e këngëtarëve modernë.
Ndonëse ishte e para Era Istrefi që solli diçka të tillë me producentin Mixey, duke ribërë vargjet e këngës “E dehun” që dikur ishte kënduar nga Nexhmije Pagarusha, një ribërje e një kënge të vjetër shqipe, u bë trend pasi Capital T rikrijoi “Hatixhen”, bashkë me Mixeyn po ashtu.
Ndërsa këtë vit, specifikë e të gjitha këngëve të lansuara, është futja e elementeve të muzikës së vjetër shqipe, qoftë burimore popullore, e qoftë ndonjë këngë së cilës i dihet autori.
“Moj Zogo”, nga Fifi, “Ajshe” së fundmi nga Adrian Gaxha e Enur Pakashtica, “Lule” – një këngë e vjetër arbëreshe e sjellë nga Dafina Zeqiri dhe Lumi B, përfshirë këtu Taynan e Melindën, që risollën në këngët e tyre të fundit vargje të njohura të muzikës popullore.
Kjo mund të jetë edhe zgjedhje e rastësishme e vetëm ndjekje e trendit, megjithatë në këtë mes ka edhe një “lojë të sigurt” me këngët e reja, meqë tashmë ato tekste populli i ka përvetësuar dhe e ka shumë të lehtë t’i mbajë në mend në rastet kur një këngë e re hidhet në treg.
SHKRUAR NGA PRIVE.AL
