‘Big Brother VIP’ pritet e përflitet tash e një kohë të gjatë.
Nga muaji në muaj, kanë kaluar sezonë e gjysmë-sezonë televiziv por patenta e njohur nuk nisi në Top Channel.
Fillimisht ishte Ledion Liço ai që e promovoi por që më pas u tërhoq pa shumë zhurmë pas trumbetimit si autor.
E duket se drejtori i Topit, Ben Blushi ka plane të tjera.
Portali Blitz.al ka raportuar se menaxheri i njohur i VIP-ave në Itali, 63 vjeçari Lele Mora ka ardhur ditën e sotme në Shqipëri me ftesë të mikut të tij Drejtor mu për këtë projekt.
Diskutimi për organizimin e ‘Big Brother VIP’ duket të ketë qenë arsyeja që e ka sjellur Moran në Shqipëri.
Italiani mësohet të ketë vizituar edhe ambientet e Top Channel, nga të cilat ka mbetur i mahnitur me investimin dhe cilësinë e televizionit.
Nëse lidhet marrëveshje me Moralën për t’ia besuar ‘Big Brother VIP’, interesimi për këtë format pa dyshim që do rritet edhe më shumë meqenëse bazuar në përvojën e italianit, produksioni do jetë goxha i arrirë. Kjo nuk do të ishte hera e parë që Top Channel sjell në Shqipëri figura të ekranit përtej Adriatikut për t’i besuar programet e saj.
Mbetet të shihet me kohën nëse një gjë e tillë do të ndodhë apo thjesht do jetë një takim i shtuar në tentativat e Blushit që në fund, kanë rezultuar pa sukses. /Prive.al
