Debutimi në skenën muzikore ndërkombëtare s’është aspak i lehtë dhe këtë duket se po e ka parasysh këngëtarja me origjinë nga Prishtina, Dua Lipa.
Dua nuk po i lë hapësirë vetes për pushim duke qenë konstant e angazhuar në koncerte në Europë e Amerikë.
Paralelisht me datat e caktuara në një agjendë taman si të një ylli botëror, Dua po punon konstant në këngë të reja dhe albumin që do e ketë gati për pak muaj.
Një periudhë dy apo tre mujore po rezulton të jetë maksimumi i pauzimit nga projekti në projekt për këngëtaren. Pas ‘Last Dance’ ajo tashmë ka gati projektin e ri që do publikohet me videoklip për katër ditë.
‘Hotter than Hell’ mban emrin kjo këngë që definitivisht e sjell Duan më HOT se kurrë më parë.
Nga pak sa ka zbuluar prej shesh xhirimeve, këngëtarja shihet të ketë eksperimentuar me stil duke shfaqur pak nga linjat e saj të mahnitshme trupore.
Për videoklipin është përkujdesur Emil Nava, një emër shumë i njohur në këtë fushë, bashkëpunëtor i dikurshëm i Ritës që madje kishte qenë në Kosovë në vitin 2012 për xhirimin e ‘Shine Ya Light’.
Kënga do jetë e zhanrit pop dhe tashmë mund të para-blihet në iTunes.
Me ‘Hotter than Hell’ supozohet se vera do jetë e Duas! /PRIVE.AL/
