Prokurorët federalë po i kërkojnë edhe një herë një gjyqtar që të mos lejojë lirimin me kusht të Sean “Diddy” Combs, duke pretenduar se manjati është përpjekur të ngatërrojë dëshmitarët dhe të ndikojë në juristët e mundshëm nga prapa hekurave.
Në dosjen e fundit, prokurorët pretendojnë se Combs ka bërë “përpjekje të pandërprera për të kontaktuar dëshmitarët e mundshëm, përfshirë viktimat e abuzimit të tij, të cilët mund të japin dëshmi të fuqishme kundër tij”.
Themeluesi i Bad Boy Records akuzohet se ka përdorur kodet e aksesit në telefon, të njohur si numrat PAC, të të burgosurve të tjerë për të kontaktuar disa njerëz – përfshirë djemtë e tij – nga burgu dhe ka bërë “telefonata tre-kahëshe për të kontaktuar individë të tjerë”.
Prokurorët gjithashtu pretendojnë se Combs ka përdorur një shërbim komunikimi të palëve të treta të quajtur ContactMeASAP për të kontaktuar individë “të paautorizuar”.
Disa nga pretendimet e prokurorëve në dosje janë redaktuar. Prokurorët përmendën rastin e një telefonate në tetor midis Combs dhe një prej djemve të tij të rritur si një shembull i përpjekjeve të tij të supozuara për të kontaktuar dëshmitarët, por specifikat e asaj thirrjeje duket se janë redaktuar. Megjithatë, prokurorët pretendojnë se thirrja “siguron konkluzionin e qartë se qëllimi i të pandehurit është të shantazhojë viktimat dhe dëshmitarët ose për të heshtur ose për të dhënë dëshmi të dobishme për mbrojtjen e tij”.
Combs ka kërkuar gjithashtu të formësojë perceptimin publik për rastin nga pas hekurave, pretendojnë prokurorët. Ata citojnë një video të postuar në Instagram nga djali i Combs, Justin, ku shfaqen fëmijët e manjatit duke i kënduar me telefon për ditëlindjen babait të tyre të burgosur, i cili mbushi 55 vjeç më 4 nëntor.
Prokurorët pos tjerash thonë se Combs, nga burgu, “monitoroi analitikën” dhe “angazhimin e audiencës – dhe diskutoi në mënyrë eksplicite me familjen e tij se si të sigurohej që video të kishte efektin e tij të dëshiruar te anëtarët e mundshëm të jurisë në këtë rast”.
