Princi Charles, trashëgimtari 71-vjeçar i fronit britanik, ka dalë pozitiv për koronavirusin dhe po izolohet me “simptoma të lehta”, njoftoi të mërkurën zyra e tij Clarence House.
Gruaja e Princit të Uellsit, Camilla, 72 vjeç, Dukeshë e Cornwall, ka provuar negativisht për COVID-19.
Të dy janë duke u izoluar në shtëpinë e tyre, Burnham, në Pasurinë Balmoral në Skoci.
“Ai ka shfaqur simptoma të lehta por përndryshe mbetet në gjendje të mirë shëndetësore dhe ka punuar nga shtëpia gjatë ditëve të fundit si zakonisht,” tha zyra e princit.
“Nuk është e mundur të përcaktohet se nga kush princi e kapi virusin për shkak të numrit të madh të angazhimeve që ai kreu në rolin e tij publik gjatë javëve të fundit,” shtoi ai.
Një burim mbretëror i tha Reuters se princi u testua të hënën dhe mori rezultatet ditën e martë.
Nëna e Charles, Mbretëresha Elizabeth II, 93 vjeçare, mbetet në shtëpinë e saj në Kështjellën Windsor jashtë Londrës me burrin e saj, Princin Philip, 98 vjeçar, sipas Reuters. Ata kanë qenë në kështjellë që nga 19 Mars.
