“Bella Ciao”, kënga e rezistencës, lirisë dhe simbolit të luftës partizane kundër fashizmit, është shndërruar në tingullin e një beteje të re, asaj me një armik të padukshëm, por jo më pak të egër, Covid-19.
Shtatë artistë nga mbarë bota, përfshirë Shqipërinë, e përfaqësuar nga Irma Libohova kanë risjellë në një version origjinal “himnin” e paqes dhe solidaritetit.
Kështu, artistit italian Tommaso Primo iu bashkuan Guillem Roma nga Spanja, Samah Mustafa nga Palestina, braziliani Deëis Caldes, Georgios Strimpakos nga Greqia, Irma Libohova dhe Laye Ba nga Senegali.
“Një version i fuqishëm dhe pasionant. Një thirrje gëzimi nga çdo kontinent, por dhe një ftesë plot shpresë që shumë shpejt do të këndojmë të gjithë së bashku.” – shkruan Irma në llogarinë e saj në Instagram, duke vazhduar, “Kantautori napoletan dhe ideatori i kësaj iniciative, Tommaso Primo, na tregon se kënga “Bella ciao” përfaqëson këngën e rezistencës dhe të intonosh këtë këngë me kantautor nga vende të tjera të botës shërben për të ripërcjellë bashkimin mes popujve, për të rikujtuar që toka nuk është aq e madhe sa e mendojmë, por është e vogël dhe duhet të kujdesemi për të. Duhet të qëndrojmë të bashkuar dhe njerëzor, sidomos në një moment si ky, kaq të komplikuar, ku bashkimin duhet ta kërkojmë e ndërtojmë me çdo kusht. Tommaso dëshironte të krijonte një sillogjizëm mes asaj që ka përfaqësuar kënga Bella Ciao, pra një këngë rezistence që nga koha kur fshataret që merreshin me korrjen e orizit e adoptuan apo kur u kthye në pjesë të revolucionit në Amerikën e Jugut.”
Ndiqni performancën e plotë në videon e mëposhtme. /Prive.al
