Pa dyshim, një prej përzgjedhjeve më të këndshme në listën e këngëtarëve të ftuar për të performuar në koncertin e Unikkatilit ishte edhe ikona e muzikës popullore, Shkurte Fejza.
Një koncert në zemër të Mitrovicës, me synim bashkimin e të gjithë shqiptarëve nuk do të kishte kuptim pa pjesëmarrjen e Shkurtes e cila ka një jetë që i këndon çështjes shqiptare në përgjithësi e bashkimit të Mitrovicës në veçanti.
Tingujt e saj që jehonin zëshëm kundër synimeve për ndarjen e qytetit të minatorëve ishin shoqëruar edhe me një imazh të kuruar i cili ra në sy.
Këngëtarja kishte zgjedhur të dukej me klas, e veshur në të zeza. Me pantallona dhe sako, Shkurtja ka reflektuar elegancë duke shkëlqyer me pamjen e saj, meritë e dizajnerit Mr. Rex.
Për paraqitjen e këngëtares, dizajneri Mr. Rex kishte menduar gërshetimin me tradicionalen përmes detajeve në njërën anë të sakos të cilat reflektojnë kulturën shqiptare e që morën mjaft vëmendje.
Më poshtë, fotografi nga paraqitja tejet dinjitoze e këngëtares Shkurte Fejza. /Prive.al
