Aktorja e Hollywoodit dhe humanitarja e OKB-së, Angelina Jolie bëri një vizitë të papritur në qytetin perëndimor të Ukrainës, Lviv, të shtunën, tha guvernatori rajonal i Lviv në Telegram.
Sipas Maksym Kozytskiy, Jolie – e cila ka qenë një e dërguar speciale e UNHCR-së për refugjatët që nga viti 2011 – kishte ardhur për të folur me personat e zhvendosur që kanë gjetur strehim në Lviv, duke përfshirë fëmijët që po trajtoheshin për lëndimet e marra në sulmin me raketa në statcionin hekurudhor Kramatorsk në fillim të muajit prill.
Sulmi në qytetin lindor të Ukrainës dukej se synonte qëllimisht një turmë kryesisht gra dhe fëmijë që përpiqeshin të largoheshin nga një ofensivë e afërt ruse, duke vrarë të paktën 52 dhe duke plagosur dhjetëra të tjerë.
“Ajo u prek shumë nga tregimet e fëmijëve”, shkroi Kozytskiy. “Një vajzë madje ishte në gjendje t’i tregonte privatisht zonjës Jolie për një ëndërr që kishte parë”.
Ai tha se Jolie vizitoi gjithashtu një shkollë me konvikt, foli me studentët dhe bëri foto me ta, duke shtuar se “ajo premtoi se do të vinte përsëri”.
Sipas Kozytskiy, Jolie u takua gjithashtu me të evakuuarit që mbërrinin në stacionin hekurudhor qendror të Lviv, si dhe me vullnetarë ukrainas që u ofronin të sapoardhurve ndihmë dhe këshillim mjekësor.
“Vizita ishte një surprizë për të gjithë ne”, shkroi ai. “Shumë njerëz që e panë zonjën Jolie në rajonin e Lviv nuk mund ta besonin se ishte me të vërtetë ajo. Por që nga 24 shkurti, Ukraina i ka treguar të gjithë botës se ka shumë gjëra të pabesueshme këtu”.
